விடுகதைகள், பழமொழிகள், கடி: தினமணி

Showing posts with label தினமணி. Show all posts

Wednesday, October 9, 2013

சிரி.. சிரி.. செப்.28

""ஆடி வந்தாத்தான் உங்க கடையிலே விலை குறைச்சு விப்பீங்களா?''
""இல்லையே... ஆடாம வந்தாலும், எங்க கடையிலே விலை குறைச்சுதானே விப்போம்?''

மனைவி: நம்ம கல்யாண நாள்
அதுவுமா ராமசாமி உருப்படவே மாட்டான்னு திட்டறீங்களே... யார் அது?
கணவன்: அவன்தான் என் தலையில உன்னைக் கட்டின திருமண புரோக்கர்.

""வீட்டோட மாப்பிள்ளை வேணும்னு கேட்டீங்களே... இவர் வீட்டைவிட்டு வெளியே தலைகாட்டவே மாட்டார் ''
""ஏன்?''
""போலீஸ் தேடிக்கிட்டு இருக்கு''
எஸ்.பொருநை பாலு,
திருநெல்வேலி.

""பாம்பு டான்ஸ் ஆடிய பெண்ணை ஏன் போலீஸ் கைது செஞ்சுட்டாங்க?''
""திடீர்னு பாம்பு சட்டையை
உரிச்சிடுச்சி''
த.கிருஷ்ணஜோதி,
சென்னை-21.

""குடை ரிப்பேர் செய்றவனுக்குப் பொண்ணைக் கொடுத்தது தப்பாப் போச்சு''
""என்ன ஆச்சு?''
""கம்பி நீட்டிட்டான்''
அ.கற்பூரபூபதி, சின்னமனூர்.

தாத்தா: எனக்கு வயசாயிடுச்சு... அதனால "பேக் பெயின்' வந்துடுச்சு. இந்த சின்ன வயசுல உனக்கும் "பேக் பெயின்'னு சொல்றீயே?
பேரன்: எனக்கு ஸ்கூல் "பேக் பெயின்' தாத்தா
சி.ரகுபதி, போளூர்.

""டாக்டர்... டாக்டர்... வேகமாக ஓடினால் மூச்சிரைக்குது''
""மெதுவா ஓடுங்களேன்''
""பிக்பாக்கெட் அடிச்சிட்டு
எப்பிடி மெதுவா ஓடுறது?''

""நேற்றைக்கு ரேஸ்ல நடக்கக் கூடாதது நடந்துவிட்டது''
""என்ன நடந்தது?''
""குதிரைதான்''
சுகந்தாராம்,
சென்னை-59.

சிரி... சிரி... அக்.05

""இந்த நாய் ஏன் ரொம்பவும் சந்தோஷமாக இருக்கு?''
""இந்த நாயோட எஜமான் தனது மகளிடம், இந்த நாய்க்கு வேணும்னா உன்னைக் கட்டி வைப்பேன். உன் காதலனுக்குக் கட்டி வைக்கமாட்டேன்னு சொன்னாராம்''
எஸ்.கிருஷ்ணன், திருவண்ணாமலை.

""ஏங்க உங்க பையன் சதா குடிச்சிட்டு திரியறான். கேட்கப்படாதா?''
""கேட்க வேண்டிய அவசியமே இல்லை. என் கோட்டாவா தினமும் ஒரு குவார்ட்டர் குடுத்திடுவான்''

""பரீட்சை ஹாலில் ஓராளு வந்து ஒரு விரலைத் தூக்கிக் காட்டிட்டு போறாரே எதுக்கு?''
""கேள்வித்தாள் அவுட்டாம்''

""நேத்து இண்டர்வியூ நடந்திட்டிருக்கும்போதே தூங்கிட்டேன்''
""அய்யய்யோ... அப்புறம்?''
""உடனே அப்பாயின்மென்ட் குடுத்து வேலையில சேரச் சொல்லிட்டாங்க''

""பட்டிமன்ற பேச்சாளர்கள் எல்லாரும் ஏன் வயதான பாட்டிகளா இருக்காங்க?''
""இது ஒரு புது முயற்சியாம். இதுக்குப் பேர் பாட்டி மன்றமாம்''

""கண்ணு சுத்தமா தெரியலை... டாக்டரை பார்க்கணும்''
""கண்ணு தெரியலைன்னு சொல்லுறீங்க. அப்ப டாக்டரை எப்படிப் பார்ப்பீங்க?''

""தலைவரோட மேடை பேச்சுல நகைச்சுவை தெறிச்சுதாமே? ''
""ஆமாம்... ஊழலை ஒழிப்போம். சட்டம் ஒழுங்கைப் பாதுகாப்போம்ன்னு ஒரே காமெடி போங்க''

""பழனி மலையிலே ஏற்பட்ட ரேப் கார் விபத்தை நான் கண்டிக்கிறேன்''
""தலைவரே... அது ரேப் கார் இல்லே. ரோப் கார்''
கு.அருணாசலம், தென்காசி.

Thursday, October 3, 2013

பயனுள்ள மருத்துவக் குறிப்புகள்

* முடக்கத்தான் இலையை சீரகம் சேர்த்து கஷாயம் வைத்து குடிக்க உடல்வலி நீங்கும்.
* இலந்தைபழம் தொடர்ந்து சாப்பிட்டு வர மார்பு வலி குணமாகும்.
* வசம்பு தூளை, தேங்காய் எண்ணெயில் சிவக்க கொதிக்க வைத்து, வடிகட்டி சிரங்கு மீது தடவி வர சொறி, சிரங்கு குணமாகும்.
* சீரகத்தை வறுத்து பொடி செய்து வாழைப்பழத்துடன் சாப்பிட்டால் சுகமான நித்திரை வரும்.
* மலை வாழைப்பழத்தை நல்லெண்ணெயில் சேர்த்து சாப்பிட சீதபேதி குணமாகும்.
* 40 வயதை தாண்டிவிட்டால் அதிக உணவை தவிர்த்து சத்துள்ள உணவு குறைந்த அளவும், அதிக பழச்சாறும் பருகினால் நோய் வராது.

Monday, September 30, 2013

பழங்களின் அரசி என்றழைக்கப்படும் திராட்சை

பழங்களின் ராணி என்றழைக்கப்படும் திராட்சை, மூன்று நிறங்களில் காணப்படுகிறது. சிவப்பு, பச்சை, கறுப்பு, என நாட்டிற்கு ஏற்றவாறு நிறங்கள் மாறுபடுகின்றன.

இந்த பழத்தில் வைட்டமீன் பி1, பி2, பி3, பி6, பி12, சி, இரும்புச்சத்து, பாஸ்பரஸ் ஆகிய சத்துக்கள் அதிகம் உள்ளன. இதன் நிறம் கண்களை கவரும் வகையிலும், சாப்பிடுவதற்கு விரும்பதக்கதாகவும் இருக்கின்றது.

திராட்சை பழத்தில் இருந்து மருந்து, ஒயின், கிரேப் சீட் எண்ணெய், சாக்லேட், ஜூஸ் என பலவற்றை தயாரிக்கலாம். உடலுக்கு தேவையான தாதுக்கள், ஆன்டி-ஆக்ஸிடன்ட், வைட்டமீன் போன்ற சத்துக்களை உடலுக்கு வழங்கி ஆரோக்கியமாக வைக்க உதவுகின்றது.

இப்பழத்தை உண்பதால்.....

* உடல் வறட்சி, பித்தம் நீங்கும். ரத்தம் தூய்மை பெறும். இதயம், கல்லீரல், மூளை, நரம்புகள் வலுப்பெறும்.

* பித்தத்தால் ஏற்படும் வாந்தி, தலைச்சுற்றல், ஒற்றை தலைவலி ஆகிய பிரச்னைகளுக்கு இது நல்ல தீர்வாக இருக்கும்.

* திராட்சைப் பழத்துடன் மிளகை சேர்த்து அரைத்து சாப்பிட்டு வர, நாக்கு வறட்டுதல் நீங்கும்.

* உடல் அசதி, பயணத்தின் போது ஏற்படும் உஷ்ணத்திற்கு திராட்சைப் பழம் ஏற்றது.

* திராட்சை சாறுடன் சர்க்கரை சேர்த்து தினமும் சாப்பிட்டு வர மாதவிடை கோளாறுகள் சரியாகும். வயிற்றுப்புண், வாய்ப்புண் ஆறுவதற்கு சிறந்த மருந்தாகும்.

* கண்பார்வையை அதிகரிக்கிறது. உடலில் தேவையில்லாத கொழுப்புகளை நீக்கவும், சிறுநீரக பிரச்னையை அகற்றவும் இது பயன்படுகிறது.

* இளம் பெண்களுக்கு ஏற்படும் முகப்பரு பிரச்னைக்கு, இதன் சாறு எடுத்து தடவினால் விரைவில் பரு கொட்டிவிடும். முகத்தில் ஏற்படும் கருவளையத்தை போக்கவும், தோல் வியாதியை கட்டுப்படுத்தவும் திரட்சை பயன்படுகிறது.

திரட்சைப்பழம் உடல் நலத்திற்கு மிக மிக நல்லது. ஆகவே தினமும் இதை உண்டு வந்தால் இளமையாகவும், அழகாகவும் இருக்கலாம்.

Monday, August 26, 2013

கண்ணைச் சுற்றிக் கருவளையம் - போக என்ன செய்வது ?

பொதுவாக கண்களைச் சுற்றியுள்ள பகுதியானது மிகவும் மிருதுவான அதிக கவனம் செலுத்த வேண்டிய சருமமாக உள்ளது. இதனை காக்க அதிக கவனம் செலுத்துவது அவசியமாகும்.
உறக்கமின்மை, மனக்கவலை, மகிழ்ச்சி, உடல் நலக் குறைவு, சோர்வு, மன அழுத்தம் என பல விஷயங்களை இந்த கருவளையம் காட்டிக் கொடுத்துவிடும்.
இது மட்டுமல்லாமல், பரம்பரை ரீதியாகவும், சத்துக் குறைவாலும் இந்த கருவளையம் ஏற்படுகிறது. எனவே ஒருவருக்கு கருவளையம் எதனால் ஏற்பட்டது என்று கண்டறிந்து அதன் மூலமாகத்தான் கருவளையத்தைப் போக்க வேண்டுமே ஒழிய, வெறும் கருவளையத்தைப் போக்க சிகிச்சை பெறுவது எந்த வகையிலும் பலன் தராது.
சிலருக்கு பரம்பரை ரீதியாகவே கருவளையம் ஏற்படலாம். அவ்வாறானவர்கள், சில முயற்சிகள் செய்வதால் ஓரளவுக்கு அதனை கட்டுப்படுத்தலாம். முழுவதுமாக போனாலும், அது மீண்டும் வருவதற்கு அதிக வாய்ப்புகள் உள்ளன.
உறக்கமின்மை காரணமாக சிலருக்கு கருவளையம் ஏற்படுகிறது. இது அவ்வப்போது வந்து, பின்பு மறைந்துவிடும். இதற்கு எந்த சிகிச்சையும் தேவையில்லை. நன்கு உறங்கினாலே போதுமானது. உறக்கம் குறையும் போது உருவாகும் கருவளையமானது, உங்களது உடல்நிலை எடுத்துக் காட்டும் கண்ணாடியாகவும் அமைகிறது.
சிலருக்கு சத்துக் குறைவால், கண்களுக்கு அருகே உள்ள சருமம் சுருங்கி அதனால் கருவளையம் தோன்றுகிறது. இதனை போக்க நல்ல சத்தான உணவுகளை சாப்பிட வேண்டும். புரதமம், நார்ச்சத்து, கொழுப்புச் சத்துள்ள உணவுகளை சாப்பிட்டு வந்தால் தானாகவே இந்த கருவளையும் மறைந்து விடும்.
சிலருக்கு அதிகப்படியான பணி பளுவால் கருவளையம் ஏற்படுகிறது. அதிக நேரம் கணினி முன் அமர்ந்து பணியாற்றுபவர்கள், அதிக நேரம் கண் விழித்து வேலை செய்பவர்கள் அல்லது படிப்பவர்கள், தொடர்ந்து டிவி பார்ப்பவர்களுக்கும் இந்த கருவளையம் ஏற்படுகிறது.
எனவே, கண்களுக்கு அதிகப்படியான அழுத்தம் கொடுப்பதை குறைத்துக் கொள்ள வேண்டும்.
இது மட்டுமல்லாமல், அதிக உடல் உழைப்பும், டென்ஷனும் கூட கருவளையத்தை ஏற்படுத்தலாம். வீட்டில் அனைத்து வேலைகளையும் ஒருவரே செய்யாமல், வேலைகளை பகிர்ந்து கொள்வதால், வேலை பளு குறையும், எனவே எல்லா வேலைகளையும் ஒருவரே செய்ய வேண்டும் என்று எண்ணாமல் வேலைகளை பகிர்ந்து கொள்ளுங்கள் அல்லது பகிர்ந்து அளியுங்கள்.
சிலருக்கு ரத்த சோகை காரணமாகவும் கருவளையம் ஏற்படுகிறது. இரும்புச் சத்துள்ள உணவுகளையும், ரத்தத்தை அதிகரிக்க உதவும் காய்கறிகளையும் அதிகம் சாப்பிட்டு ரத்த சோகையை சரி செய்தால், இநத் கருவளையமும் தானாகவே மறைந்துவிடும். கீரை, நெல்லிக்காய், பீட்ரூட், நாவல்பழம் போன்றவற்றில் இரும்புச் சத்து உள்ளது.
எனவே, கருவளையம் வந்து விட்டதே என்று எண்ணி அதற்காக பல க்ரீம்களை போட்டு மன உளைச்சலுக்கு ஆளாகாமல், முதலில் எதனால் கருவளையம் வந்தது என்று கண்டறிந்து அதனை குணப்படுத்த முயலுங்கள். கருவளையம் தானாகவே சரியாகிவிடும்.

கண்ணைச் சுற்றிக் கருவளையம் போக என்ன செய்வது ?

http://www.eegarai.net/t93597-topic by Muthumohamed on Thu Dec 27, 2012 1:22 am

கண்ணைச் சுற்றிக் கருவளையம் போக என்ன செய்வது ? வராமல் இருக்க எதை தவிர்ப்பது !!

இன்றைய உலகில் உள்ள பெண்களுக்கும் ஆண்களுக்கும் ஏற்படும் பிரச்சனைகளில் ஒன்று தான் கருவளையம். அதிக வேலைச் சுமையினால் போதுமான தூக்கம் கிடைக்காததால், கண்களைச் சுற்றி கருப்பான வளையங்கள் வருகின்றன. இவ்வாறு கருவளையங்கள் வருவதால், முகம் சற்று பொலிவிழந்து, முதுமைத் தோற்றத்தை தருகிறது. வீட்டில் இருக்கும் இயற்கை பொருட்களே வைத்தே கருவளைத்தை போக்கலாம்.

*எலுமிச்சை சாறு மற்றும் தக்காளி சாற்றை சம அளவு எடுத்து கலந்து, ஒரு நாளைக்கு இரண்டு முறை தடவி வந்தால், கருவளையங்கள் குறைந்துவிடும்.

* தினமும் படுக்கும் முன்பு, வைட்டமின் ஈ மற்றும் சி நிறைந்த க்ரீம்களை தடவி வந்தால், கருவளையம் போய்விடும்.

* சிறிது புதினா இலையை பேஸ்ட் செய்து , அதனை கண்களைச் சுற்றி தடவி வந்தால், கண்களில் இருக்கும் களைப்பு நீங்கி, கண்கள் புத்துணர்ச்சியுடன் இருக்கும்இந்த நாகரீக உலகில் முக்கால்வாசிப் பேருக்குக் கண்களை சுற்றிலும் கருமையாக வளையம் போன்று காட்சியளிப்பது பொதுவாகிப் போய்விட்டது. ஆண்களைக் காட்டிலுட்ம பெண்களுக்கே இது அதிகமாகக் காணப்படுகிறது. இதற்கு வயது வரம்பு கிடையாது. எல்லா வயதினருக்கும் இது பரவலாக இருக்கிறது. மேலும் வயதாக இது அதிகமாகிக் கொண்டே போகிறது.

* உருளைக்கிழங்கை அரைத்து அதிலிருந்து வரும் சாற்றை, காட்டனில் நனைத்து, அதனை கண்களைச் சுற்றி தடவி, 10 நிமிடம் ஊற வைத்து, பின் குளிர்ந்த நீரில் கழுவினால், கண்களைச் சுற்றி இருக்கும் கருவளையங்கள் எளிதில் போய்விடும்.

இக்கருவளையம் தோலில் ஏற்படும் அதிகமான 'பிக்மெண்டேஷன்' காரணமாக ஏற்படுகிறது. இது ஒருவகை வியாதியல்ல. இது கண்ணுக்குக் கெடுதலோ மற்ற எந்த வகையிலும் தொந்தரவோ அளிப்பதில்லை. இருப்பினும் சிலர் இதுகுறித்து மிகவும் கவலைப்படுகின்றனர். மற்ற அழகுப் பிரச்னைகளைப் போலவே இதற்கும் பல காரணங்கள் உண்டு. இரும்புச்சத்து, வைட்டமின் ஏ, வைட்டமின் ஈ, கால்சியம் போன்ற சத்துக்கள் குறைந்த உணவும் இதற்கு ஒரு காரணம். புற்றுநோய், டி.பி., நிமோனியா போன்றவைகளால் தாக்கப்பட்டாலும் உடலில் சத்துக் குறைந்து இது ஏற்படுகிறது. மேலும் அதிக வேலை, தூக்கமின்மை அசதி போன்ற காரணங்களும் இதற்கு பொறுப்பாகின்றன.

கண்களைச் சுற்றயுள்ள தோல் மிகவும் மென்மையானது. எனவே அதிக வெயிலில் வெளியே செல்வது, வெயிலிலேயே நாள் முழுவதும் வேலை செய்வது போன்றவை கண்களை அதிகம் பாதித்து கருவயைம் ஏற்பட ஏதுவாகிறது. அதிக சிந்தனை, மன உளைச்சல் போன்றவையும் கண்களைப் பாதிக்கும்.
ஒருமுறை கண்களைச் சுற்றி கருவளையம் ஏற்பட்டால் அதை சரி செய்வது மிகவும் கடினமாகும். மேற்கண்ட கரணங்களைத் தவிர்த்தால் நாளடைவில் சிறிய முன்னேற்றமிருக்கும். அதற்கான சில தடுப்பு முறைகளை நாம் மேற்கொள்ள வேண்டும்.

நல்ல ஊட்டச்சத்துள்ள உணவு இதற்கு சிறந்த வழியாகும். தினசரி உணவில் கீரை வகைகள், பச்சைக் காய்கறிகள், சூப் இவற்றைச் சேர்த்துக் கொண்டால் இவற்றிலுள்ள வைட்டமின் ஏ, வைட்டமின் ஈ, கால்சியம் மற்றும் இரும்புச் சத்து போன்றவை உடலில் கலந்து நல்ல பலனளிக்கும். உணவைப் பொறுத்தவரை நாம் அஜாக்கிரதையாக இருக்கக்கூடாது. ஏனெனில் இந்தப் பிரச்சனையில் உணவு முக்கிய பங்கு பெறுகிறது. உணவில் போதிய சத்துக்கள் கிடைக்காவிடில் வைட்டமின் ஏ,ஈ, கால்சியம், இரும்புச்சத்து அடங்கிய மருந்து, மாத்திரைகளை தினமும் எடுத்துக் கொள்ளலாம். நமக்கு வசதிப்பட்ட முறையில் மாத்திரையாகவோ, டானிக்காகவோ, ஊசியாகவோ இச்சத்துக்கள் கொண்ட மருந்துகளைப் பெற்று உபயோகிக்கலாம்.

அடுத்ததாக மனநிலை இதற்கு ஒரு காரணமாக இருக்கிறது. ஒருவருக்கு அதிக மனவருத்தம், மனஉளைச்சல் ஏற்பட்டால் அதைப் பற்றியே சிந்தித்துக் கொண்டிருந்தால் அந்தப் பிரச்சினைக்கு முடிவு ஏற்படாது. தொடர்ந்து அதையே நினைத்து கொண்டிருந்தால் உடல் நிலைதான் பாதிக்கப்படுமேயல்லாம் பிரச்சினை தீரப்போவதில்லை. எனவே, அதைப் பற்றி வருந்தாமல் அப்பிரச்சினைக்கு முடிவு காணும் வழியே யோசித்தால் உபயோகமாக இருக்கும். ஒரு பிரச்னை ஏற்பட்டால் பதற்றமோ ஆத்திரமோ கொள்ளாமல் அமைதியாக இருந்து சிந்தித்து வழி காண முயற்சி செய்தால் பிச்சினையும் தீரும். உடல்நிலையும் பாதிக்காது.

வெளியே வெயிலில் செல்லும்போது கண்களுக்கு கண்ணாடி அணிந்து சென்றால் இக்கருவளையம் ஏற்படுவதைத் தடுக்கலாம். மேலும் வெயிலிலேயே நாள் முழுவதும் வேலை செய்பவர்களுக்கேற்ப தனிப்பட்ட முறையில் கண்ணாடிகள் தயாரிக்கப்படுகின்றன. கண்களுக்கு அதிகபடியான வேலை கொடுப்பர்களுக்கும் இக்கருவளயம் உண்டாகுகிறது. சில முறையான வழிகளைக் கடைப்பிடிப்பதால் அதைத் தடுக்கலாம்.

படிக்கும்போது விளக்கொளி சரியாக அமைந்திருக்க வேண்டும். ஒளி புத்தகத்தில் நேராகப் படுமாறு இருக்கவேண்டும். டைப் அடிப்பவர்கள் நூலகத்தில் இருப்பவர்கள் போன்ற சில குறிப்பிட்ட வேலை செய்பவர்களுக்குக் கண்களுக்கு அதிகப்படியான வேலை கொடுக்க வேண்டியுள்ளது. இவர்கள் யோகசனம் மற்றும் சில பயிற்சிகள் செய்து கண்களுக்கு ஓய்வு தர வேண்டும். கண்கள் மிகவும் களைத்துப் போகும் போது காய்சசாத பால் பஞ்சைத் தோய்த்துக் கண்களை மூடிக்கொண்டு இமைகளின் மேல் சிறிது நேரம் வைத்துக்கொள்ள வேண்டும். பாலுக்குப் பதிலாக பன்னீரில் பஞ்சைத் தோய்த்து இதேபோல் செய்யலாம்.

1. வெள்ளரிக்காய் சாறு எடுத்து அதில் பஞ்சை தோய்த்து கருவளையங்களின் மேல் வைக்கலாம்.

2. வெள்ளரிச்சாறும் உருளைக்கிழங்கு சாறும் கலந்து பஞ்சைத் தோய்த்து கண்களில் வைக்கலாம்.

3.வெள்ளரிக்காய், உருளைக்கிழங்கு இவற்றை வட்டவட்டமாக வெட்டி கண்களில் மேல் வைக்கலாம்.

4. கடலைமாவில் எலுமிச்சைக்காறு கலந்து பசை போல் குழைத்து கருவளையங்களின் மேல் தினமும் தடவி வந்தால் நாளடைவில் கருவளையம் மறையும்.

5. முல்தானி மட்டியையும் பன்னீரையும் குழைத்துப் பேசி வரவும்.
மேலும் நல்ல, சிறந்த மேக்கப் கருவளையத்தை குறைத்துக் காட்டும். வெளிர்நிற ஃபவுண்டேசனை உபயோகித்தால் இக்குறையை மறைக்கலாம்.

6. கண் அடியில் கருமை இருந்தால் பார்மஸியில் கிடைக்கும் ஈஸ்ட் மாத்திரை வாங்கி அதைத் தண்ணீரில் கலந்து கண்ணுக்கு அடியில் தடவலாம்.

7. கண்களுக்கடியில் கருவளையம் இருந்தால் உருளைக்கிழங்கைத் துருவி மெல்லிய துணிகளில் கட்டி கண்களின் மீது 20 நிமிடம் வைத்து எடுக்கவும். வெள்ளரித் துண்டுகளையும் வைத்து எடுக்கலாம். டீ டிகாக்ஷனில் ஊறிய பஞ்சினையும் வைத்து வரலாம்.

8. கண் இமைகளிலும், புருவங்களிலும் தரமான விளக்கெண்ணெய் தேய்த்து வருவதால் முடிகள் பளிச்சென்று கருமையாக வளரும்.

நன்றி
பரமக்குடி சுமதி(இன்று ஒரு தகவல்)

Thursday, June 27, 2013

மனிதச் சங்கிலி முறையில் 10 பேருக்குச் சிறுநீரக அறுவை

மும்பையில், மனித சங்கிலி முறையில் ஒரே நேரத்தில் 10 பேருக்கு 40 மருத்துவர்கள் 3 மருத்துவமனைகளில் சிறுநீரக மாற்று அறுவை சிகிச்சையை மேற்கொண்டுள்ளனர்.

மும்பையில், 5 குடும்பத்தைச் சேர்ந்த இரண்டு பேருக்கு 3 மருத்துவமனைகளில் ஒரே நேரத்தில் அறுவை சிகிச்சை நடத்திருப்பது நாட்டில் இதுவே முதல் முறையாகும்.

அதாவது, சிறுநீரகம் செயலிழந்து, மாற்று சிறுநீரகத்துக்காக காத்திருக்கும் நோயாளிகளின் உறவினர்கள், சிறுநீரகத்தை தானமாகத் தரத் தயாராக உள்ளனர். ஆனால், அவர்களது சிறுநீரகம் உறவினருக்கு பொருத்தமானதாக இல்லை.

இந்த நிலை பல இடங்களில் நேரிடுகிறது. எனவே இதனை புத்திசாலித்தனமாக எதிர்கொள்ளும் வகையில், இதுபோல சிறுநீரகம் பாதித்துள்ள நோயாளிகள் மற்றும் அவர்களுக்கு சிறுநீரகம் அளிக்க முன்வரும் உறவினர்கள் ஆகியோரை ஒன்றிணைத்து, ஒரு மனித சங்கிலி உருவாக்கப்பட்டது.

அதாவது, ஒரு மகளுக்கு சிறுநீரகத்தை தானமாக தர முன் வரும் தந்தையின் சிறுநீரகம் மகளுக்குபொருந்தாத நிலையில், இரண்டாவது நோயாளிக்கு தந்தையின் சிறுநீரகம் பொருந்தலாம். இரண்டாவது நோயாளிக்கு சிறுநீரகம் தர முன் வரும் உறவினரின் சிறுநீரகம் மற்றொரு 3வது நோயாளிக்கு பொருந்தலாம். இப்போது 3வது நோயாளிக்கு சிறுநீரகம் தர முன் வரும் உறவினரின் சிறுநீரகம், அந்த மகளுக்கு பொருந்தலாம்.

இவ்வாறு ஒரு மனிதச் சங்கிலியை உருவாக்கி 5 நோயாளிகளுக்கு ஒரே நேரத்தில் 5 பேரிடம் இருந்து சிறுநீரகத்தை எடுத்து பொருத்தி 5 பேரின் உயிரைக் காப்பாற்றியுள்ளனர் மருத்துவர்கள்.

இது ஒரு மிகப்பெரிய தகவல் திரட்டு மூலம் பெற்ற வெற்றியாகும். இதன் மூலம், சிறுநீரகம் கிடைக்காமல் இருக்கும் பலரும் மறு வாழ்வு பெறுவார்கள் என்கின்றனர் மருத்துவர்கள்.

இரு நாடுகளுக்கு இடையே அமைந்துள்ள விக்டோரியா அருவி

இயற்கை படைத்த அற்புதங்களில் விக்டோரியா நீர்வீழ்ச்சியும் ஒன்று. ஆப்பிரிக்கா கண்டத்தில், ஜிம்பாப்வே நாட்டுக்கும் ஜாம்பியா நாட்டுக்கும் எல்லையாக இந்த அருவி அமைந்துள்ளது.

விக்டோரியா நீர்வீழ்ச்சியை முதன் முதலில் கண்டுபிடித்துச் சொன்னவர் இங்கிலாந்தின் ஸ்காட்லாந்து பகுதியைச் சேர்ந்த புகழ்பெற்ற சுற்றுலாப் பயணி டேவிட் லிவிங்ஸ்டோன் என்பவர். இவர் ஆப்பிரிக்கக் காட்டுப் பகுதியை சுற்றி வந்தபோது, 1855-ம் ஆண்டு,நவம்பர் 16-ம் நாள் இந்த நீர் வீழ்ச்சியைப் பார்த்தாராம். மிக உயரத்திலிருந்து விழும் இந்த நீர் வீழ்ச்சியைக் கண்டதும் ஆச்சரியப்பட்டு, இதைப் போல நான் எங்கும் கண்டதில்லை என்றாராம்.

இவர்தான் இந்த நீர்வீழ்ச்சிக்கு இங்கிலாந்தின் அரசியான விக்டோரியா மகாராணியின் பெயரைச் சூட்டியவர்.

ஆனால் ஆப்பிரிக்க மக்கள் இந்த நீர்வீழ்ச்சியை "மோஷி ஓயா துன்யா' என்றுதான் அழைக்கிறார்கள். இதற்கு "இடி முழக்க புகை மண்டல அருவி' என்று பொருள். அவர்கள் இந்தப் பெயரைச் சூட்டியதற்கும் ஒரு காரணம் உண்டு. இந்த அருவி ஏற்படுத்தும் இடிமுழக்கம் போன்ற ஒலியும் நீர் விழுவதால் ஏற்படும் புகைமண்டலத் துளிகளும் இந்தப் பெயர் சரிதான் என்கின்றன.

இதன் அகலம் 1708 மீட்டர். உயரம் 108 மீட்டர். இதுதான் உலகின் மிகப் பெரிய நீர்வீழ்ச்சியாகக் கருதப்படுகின்றது.

இந்த நீர்வீழ்ச்சிக்குக் காரணமான "ஜாம்பஸி' நதி 1000 மைல் தொலைவிற்குத் தடையின்றி ஓடி வருகிறது. இப்படி ஓடிவந்து அதலபாதாளத்தை நோக்கி விழும் போதுதான் இதுபோன்ற இடிமுழக்கம் போலக் கேட்கும் ஓசை ஏறப்டுகிறது. இது கீழே வீழ்ச்சியடையும்போது எழும் சாரலும் நீர்த்திவலைகளும் புகை போல எழும்பும். இது 40 மைல் தொலைவுக்கு அப்பாலும் நன்றாகத் தெரியும்.

இப்படிச் சிதறி விழும் நீர்த்திவலைகளில் சூரிய ஒளி படுவதால் இப்பகுதியில் எப்போதும் வானவில்லைக் காணலாம். சில சமயங்களில் இரண்டு வானவில்கள் தோன்றி வர்ணஜாலம் புரிந்து கண்ணைக் கவரும். பௌர்ணமி இரவில்கூட இங்கு வானவில் தோன்றி அதிசயம் புரியும்.

"ஜாம்பஸி' நதி, விக்டோரியா நீர்வீழ்ச்சியாக விழுந்து மீண்டும் அடர்ந்த காடுகளின் வழியே மிகப் பெரிய நதியாகப் பாய்ந்து ஓடுகிறது.

இந்த அருவியைக் காண ஆண்டுதோறும் லட்சக்கணக்கான சுற்றுலாப் பயணிகள் இங்கு வந்து போகின்றனர். இதனால் ஜிம்பாப்வே மற்றும் ஜாம்பியா நாடுகளுக்கு ஏகப்பட்ட வருமானம்!

இந்த அருவியை ஒட்டி ஜாம்பியா நாட்டுக்கும் ஜிம்பாப்வே நாட்டுக்கும் எல்லைப் பகுதியில் நதியின் மீது மிக நீண்ட அழகிய பாலம் ஒன்றும் கட்டப்பட்டுள்ளது.

இந்தப் பாலத்தின் வழியே செல்லும்போது, இந்த நீர்வீழ்ச்சியின் முழு அழகையும் கண்டு அதிசயக்கலாம். முடிந்தால் ஒரு நடை நீங்களும் போய்ப் பார்த்துவிட்டு வந்துவிடுங்கள்

Saturday, May 18, 2013

சில நகைச்சுவைகள்

வாழ்க்கையில் எதற்கெல்லாமோ சிரிக்கிறோம்.. ஒரு நகைச்சுவைக்காக சிரிக்க மாட்டோமா.. நிச்சயமா சிரிப்பீங்க.. நாங்க நம்புறோம்...
செய்தியாளர் : உங்களது வருங்காலக் கணவர் எப்படி இருக்க வேண்டும் என்று நீங்கள் விரும்புகிறீர்கள்?
நடிகை : இப்போது இருப்பவரை விட சிறந்தவராக இருக்க வேண்டும்.
***
கோபு : நேத்து ஹோட்டல் வைத்திருப்பவர் வீட்டில் பொண்ணு பாக்க போனியே என்ன ஆச்சு?
பாபு : அத ஏன் கேக்குறீங்க.. பொண்ண பாத்துட்டு புடிக்கலன்னு சொன்னதும், குடிச்ச டீக்குக் கூட பில் போட்டு கொடுத்துட்டாங்கண்ணா பாத்துக்கோங்களேன்.
***
ஒரு பொண்ணு போன எடுத்து எடுத்துப் பார்த்தா என்ன அர்த்தம்?
புதுசா காதலிக்கிறான்னு அர்த்தம்
போன் வரும்போதெல்லாம் கட் பண்ணினா என்ன அர்த்தம்?
காதலன புடிக்கலன்னு அர்த்தம்
பொண்ணு தலை குனிஞ்சி நடந்தா என்ன அர்த்தம்?
போன்ல மெசேஜ் ப்ரீன்னு அர்த்தம்.
***
பொண்ணுங்க போன பத்தி என்னடா நினைக்கிற...
ரூ.20 ஆயிரத்துக்கே போன வாங்கினாலும், அதுல மிஸ்டுகால் மட்டும்தான் கொடுப்பாங்கடா..
***
கல்யாணம் பண்ணிக்க சொல்லி உன் பின்னாடி பொண்ணுங்களா அலையுதுன்னு சொல்லி ஏதோ பயங்கரமா பில்டப் கொடுக்கிறீயே.. அதில ஏதாவது 2 பொண்ண பத்தி சொல்லு...
ஒண்ணு எங்க அம்மா.. இன்னொன்னு எங்க பாட்டி.
***
என் பொண்டாட்டின்னா எனக்கு ரொம்ப பயம்.. நீங்க எப்படி?
அட போங்க நான் அவ்ளோ மட்டமில்லை. உங்க பொண்டாட்டிக்கெல்லாம் பயப்பட மாட்டேன்.
***

Monday, March 18, 2013

நிறை நிலா (வெள்ளுவா) வராத மாதமும் உண்டு

நமது உலகத்தில் பல்வேறு அதிசயங்களும், ஆச்சரியங்களும் நிறைந்துள்ளன. அவற்றை நாம் தெரிந்து கொண்டால், நண்பர்கள் அல்லது உறவினர்களுடன் இருக்கும் போது துணுக்காக சொல்லி உடன் இருப்பவர்களை வியப்பில் ஆழ்த்த பயன்படும். எனவே இதுபோன்ற துணுக்குகளைப் படிக்க எப்போதுமே ஆர்வம் அதிகம்.
சரி உங்களது ஆர்வத்தை நாங்கள் பூர்த்தி செய்கிறோம். இதோ உங்களுக்காக சில துணுக்குகள்..
மில்லியன் ஸீரோக்களைக் கொண்ட எண்ணை கூகுள் என்று அழைப்பார்கள். இப்போது புரிகிறதா.. கூகுளின் கீழ் உள்ள G000000000GLEன் அர்த்தம்.
டைட்டானிக் கப்பலை கட்டி முடிக்க வெறும் 7 மில்லியன் டாலர்களே செலவானது. ஆனால், அது பற்றி படம் எடுக்க 200 மில்லியன் டாலர்கள் செலவிடப்பட்டது.
யாராவது மூன்று பேர் ஒன்றாக அமர்ந்திருந்தால் அவர்களை மூன்று குரங்குகளுடன் ஒப்பிடுவோம். அந்த குரங்குகளின் பெயர் என்ன தெரியுமா.. மிசரு (தீயவற்றை பேசாதே), மிகசரு (தீயவற்றை கேட்காதே), மசரு (தீயவற்ற பேசாதே).
ஆங்கிலத்தில் ஒன் முதல் தவுசண்ட் வரை எழுதிப் பார்த்தால், அதில் தவுசண்ட் என்ற வார்த்தையில் தான் முதல் ஏ வைப் பாக்க முடியும்.
வெள்ளை நிறத்திலான ஒலிம்பிக் கொடியில் உள்ள வளையங்கள், சிவப்பு, கருப்பு, நீலம், பச்சை, மஞ்சள் நிறங்களில் இருக்கும். இந்த ஐந்து நிறங்களில் ஒரு நிறமாவது அனைத்து நாடுகளின் தேசியக் கொடியிலும் நிச்சயம் இடம்பெற்றிருக்கும் என்பது கருத்து.
பொதுவாக மிகப்பெரிய மாவீரர்களின் சிலைகள் குதிரையின் மீது அமர்ந்தவாறு இருக்கும். அவற்றில் ஒரு சில குதிரை, தனது முன்னங்கால்களை தூக்கியபடி நிற்பதாக இருக்கும். அப்படியானால், அந்த வீரன் போரில் உயிரிழந்தான் என்பதை குறிக்கும். ஒரு காலை மட்டுமே தூக்கியபடி குதிரை நின்றால், அந்த வீரன், போரில் ஏற்பட்ட காயங்களால் உயிரிழந்ததாக அர்த்தமாகும். நான்கு கால்களையும் தரையில் ஊன்றி இருந்தால், இயற்கை மரணம் அடைந்ததாக அர்த்தமாகுமாம்.
மனிதனுக்கும் கோலாக் கரடிகளுக்கும் மட்டுமே கை ரேகைகள் இருக்கும்.
ஒரு மனிதன் சராசரியாக 2 வாரங்களை தன் வாழ்நாள் முழுவதும் டிராபிக் சிக்னல்களில் செலவிடுகிறான். இதே அமெரிக்காவில் வாழும் ஒரு மனிதன் தன் வாழ்நாளில் 6 மாதங்களை சிக்னல்கள் முன் செலவிடுகிறாராம்...
கொசுக்களுக்கு மற்ற எந்த நிறத்தை விடவும் நீல நிறம் தான் அதிகம் பிடிக்குமாம்.
1865ஆம் ஆண்டு பிப்ரவரி மாதம்தான் இதுவரை பௌர்ணமியே வராத ஒரு மாதமாகும்.
ரேடார் டியூப்பை விஞ்ஞானி கடந்து சென்ற போது, அவரது பாக்கெட்டில் வைத்திருந்த சாக்லேட் உருகிவிட்டதாம். இதை வைத்து கண்டுபிடிக்கப்பட்டது தான் மைக்ரோவேவ் அவன்.
1932ஆம் ஆண்டு குளிர் காலத்தின் போது நயாகரா நீர்வீழ்ச்சி முற்றிலும் உரைந்து ஐஸ்கட்டியாகிவிட்டதாம்.
உலகத்தில் வாழும் மனிதர்களின் எண்ணிக்கையை விட அதிகமாக கோழிகளின் எண்ணிக்கை உள்ளதாம்.
ரப்பர் பேண்டுகளை பிரிட்ஜில் வைத்தால், அதிக நாட்களுக்கு இழுவைத் தன்மையோடு இருக்கும்.
தும்மும் போது நமது கண்களை திறந்து வைத்திருக்கவே முடியாது.
உணவில் தேன் மிகவும் எளிதாக ஜீரணமாகும் உணவாக உள்ளது. அது எதனால் என்றால், பூவில் இருந்து தேனை எடுக்கும் தேனீ ஏற்கனவே அதனை ஜீரணம் செய்து விடுவதால்தான். மேலும் கெட்டுப் போகாத ஒரே உணவு தேன் மட்டுமே.
இதுபோன்றவை இன்னும் தொடரும்...

+++++++++++++++++++++++++++++++++++++++++++++++++++++++++++++++++++++++

கருத்துகள்(2)

மிகவும் அவசியமும் தேவையானதும் ஆன தகவல்கள்.நல்ல முயற்சி .தொடரட்டும் இந்த பணி

பதிவுசெய்தவர் சுப்ரமணியன்.கே.வி. 03/17/2013 06:53 இதற்கான பதில் முறையற்ற கருத்து

2018 பிப்ரவரி கூட பௌர்ணமியே வராத ஒரு மாதமாகும். அது சரி. இரண்டு பௌர்ணமி வந்தால் அதை ப்ளூ மூன் என்கிறோம். பௌர்ணமியே வராவிட்டால் அதை எப்படி குறிப்பிடுவது?

+++++++++++++++++++++++++++++

நீல நிலவிற்கு(blue moon ) எதிர்ச்சொல் கருநிலவு (black moon )என்பதாகும்.அன்புடன் இலக்குவனார் திருவள்ளுவன் /தமிழே விழி! தமிழா விழி! எழுத்தைக் காப்போம்! மொழியைக் காப்போம்! இனத்தைக் காப்போம்!/

Friday, January 18, 2013

வெள்ளரியின் மகிமை

நம்மில் பலருக்கும் வெள்ளரி சாப்பிடப் பிடிக்கும். வெள்ளரியில் காய், பிஞ்சு என்று இரு வகையுண்டு. மருத்துவக் குணங்கள் நிறைந்தது வெள்ளரி. இது ஒரு நல்ல நீரிளக்கி, செரிமானத்துக்கு உதவுவது. வெள்ளரிப்பிஞ்சு பித்தத்தைத் தணித்து குடலுக்கு குளிர்ச்சியூட்டுகிறது. சிறுசீரகக் கோளாறைச் சரிசெய்கிறது. தலை சுற்றலைத் தடுக்கிறது.
சமீபத்திய ஓர் ஆய்வின்படி மூட்டு வீக்க நோய்களை வெள்ளரி குணமாக்குகிறது என்று கண்டறிந்துள்ளனர். எனவே வெள்ளரி ஒரு முக்கிய காய்கறி வகை என்று கூறலாம். வெள்ளரியில் கலோரிகள் குறைவாக உள்ளதால், உடல் பருமனைக் குறைக்க விரும்புவோருக்கு நல்லது. வெள்ளரிச் சாறுடன் விதைகளையும் சேர்த்துச் சாப்பிட்டால் நல்ல பலன்கள் ஏற்படும். வாதத்தைப் போக்கவும் இது உதவுகிறது. சிறுநீரகத்துக்கும் நன்மை புரிகிறது. நீரிழிவு நோயாளிகளும், உடல் பருமனைக் குறைக்க விரும்புபவர்களும் வெள்ளரிப் பிஞ்சுகளை அதிகமாகச் சாப்பிடுவது நன்மை பயக்கும்.

இன்றைய மருத்துவக் குறிப்புகள்

* ஆப்பிள் பழம், தேன், ரோஜா இதழ், குங்குமப்பூ, ஏலக்காய் ஆகியவை ஒரு மாதம் தொடர்ந்து சாப்பிட்டு வர சுகப்பிரசவம் ஆகும்.
* கர்ப்பிணிப் பெண்கள் வெற்றிலை பாக்குடன் குங்குமப்பூவை சேர்ந்து சாப்பிட்டால் குழந்தை, சுகப்பிரசவம் ஆகும்.
* துளசி இலையை கசக்கி முகத்தில் தேய்த்து ஊரவிட்டு, குளித்து வந்தால் முகம் அழகு பெறும்.
* குழந்தைகளுக்கு ஏற்படும் தொடர் இருமலுக்கு சிறிது பெருங்காயத்தை வெந்நீரில் கரைத்து தெளிந்த நீரை கொடுத்து வர, இருமல் குறையும்.
* மனத்தக்காளி கீரை அடிக்கடி சாப்பிட்டு வந்தால் வாய்ப்புண் மற்றும் வயிற்றுப்புண் குணமாகும்.
* கோவைப்பழம் சாப்பிட பல் வலிக்கு நிவாரணம் பெறலாம்.

பயன் தரும் மருத்துவக் குறிப்புகள்

* எலுமிச்சம்பழத்தின் சாறை ஓரிரு துளிகள் காதில் விட காது வலிதீரும்.
* குடல்புண் குணமாகவும், வயிற்றுப்புழுக்கள் அழியவும் அகத்திகீரை நல்ல உணவு.
* தேனில் ஊறவைத்த நெல்லிக்காய் தினசரி ஒன்று சாப்பிட்டு வர நுரையீரல் பலப்படும்.
* அத்திபழம் தினந்தோறும் 5 சாப்பிட்டு வர நரம்பு தளர்ச்சி சரியாகும்.
* முற்றிய வெண்டைக்காயை சூப் செய்து குடித்து வந்தால் இருமல் உடனே நிற்கும்.

Saturday, December 8, 2012

கடி

ஒருவர்: ஆஹா... நான் பிழைச்சிக்கிட்டேன்... ஆபரேஷன் சக்ஸஸ்..!
மற்றவர்: யோவ்... ரொம்பக் கத்தாதே... இது எமலோகம்!
-எஸ்.வேல் அரவிந்த், காங்கேயம்.

ஏ ஆசிரியர்: திருக்குறளை எழுதியவர் யார்?
மாணவன்: நம்ம ஆசிரியருக்கு என்னடா ஆச்சு?
மற்றொரு மாணவன்: ஏண்டா..?
மாணவன்: இப்பதான்டா, சார் போர்டுல திருக்குறள்னு எழுதினாரு. அதுக்குள்ளே திருக்குறளை எழுதினவர் யாருன்னு கேட்குறாரு பாரு!
-எம்.மகாலட்சுமி,
த/பெ. எம்.மகாராஜன்,
ஜங்கால்பட்டி, தேனி மாவட்டம்.

ஒருவர்: இன்னிக்கு மழை பெய்யும்னு சொன்னாங்களே... நீ கேட்டியா?
மற்றவர்: நான் ஒண்ணும் கேட்கலே... அவங்கதான் சொன்னாங்க...!
-பி.கவிதா,
சிதம்பரம்.

ஒருவர்: தீயணைப்பு நிலையம் இங்கே இருந்ததே... இப்ப காணோமே?
மற்றவர்: போன வாரம்தான் தீப்பிடிச்சி, எரிஞ்சி போச்சி..!
-எஸ்.சடையப்பன்,
திண்டுக்கல்.

ஆசிரியர்: மாணவர்கள் சொல்லுகிற அதிகமான பதில் எது தெரியுமா?
மாணவர்கள்: தெரியாது சார்...
ஆசிரியர்: சரியான பதில்!
-எஸ்.லிவின்,
கும்பகோணம்.

ஏ அப்பா: உன்னை அம்மாதானே அடிச்சாங்க... அதுக்குப் போய் இப்படி அழுதுகிட்டே இருக்கியே?
மகன்: போங்கப்பா..! என்னால உங்கள மாதிரி அடி தாங்க முடியாது!
-நா.வினேத்குமார்,
த/பெ. சி.நாகராஜ்,
427, அண்ணா தெரு,
பாராஞ்சி கிராமம் (அஞ்சல்), அரக்கோணம் வட்டம்,
வேலூர் மாவட்டம் 632 510

Saturday, December 1, 2012

சிரி...சிரி... சிரி...சிரி

""கச்சேரிக்குத்தான் கூட்டம் வந்துடுச்சே...பாடகர் ஏன் பாடாமல் உட்கார்ந்து இருக்கிறார்?''
""மெளனராகம் பாடறாராம்!''

""சங்கீத வித்வானுக்கு கடன் கொடுத்தது தப்பாப் போச்சே''
""ஏன்...என்னாச்சு?''
""திருப்பிக் கேட்டா ஒரே பஞ்சப்பாட்டு பாடுறார்''
ஜீ.வி.சுபாஷ், சேலம்

""இப்படி சம்பந்தம் சம்பந்தமேயில்லாமல் பேசிக்கிட்டு போறாரே! யார் இவர்?''
""எங்க சம்பந்தி!''
மாயாண்டி சந்திரசேகரன்,
பாளையங்கோட்டை

""டாக்டர் என் கணவன் எப்போ கண் திறந்து பேசுவார்?''
""பேசுவார்...ஆனா கண் திறந்து பேசமாட்டார். வாயைத் திறந்துதான் பேசுவாரு''
ஜி.எஸ்.கார்த்திக்,
கோபிசெட்டிப்பாளையம்

""உங்க பேங்க்ல கால்நடைக்கு லோன் கொடுப்பீங்களா?''
""கண்டிப்பா!''
""அப்படின்னா நான் பக்கத்து ஊர்ல இருந்து கால்நடையா 18 கிலோமீட்டர் நடந்தே வந்திருக்கேன்; எனக்கு உடனே லோன் கொடுங்க''
எஸ்.எம்.ஷாஜஹான், மேலப்பாளையம்.

""உங்க ஆஃபீஸ்ல மரம் நடுவிழா கொண்டாடுனீங்களே என்ன மரம் நட்டீங்க?''
""தூங்கு மூஞ்சி மரம்''
""உங்க மனைவிக்குப் பட்டுப்புடவை வாங்கித் தந்தீங்களாமே, காஞ்சிப்பட்டா? ஆரணிப்பட்டா?''
""கடன் பட்டு''
ஜோ. ஜெயக்குமார், நாட்டரசன்கோட்டை.

""ஆபரேசனுக்கு பின்னாடி கண் நல்லாத் தெரியும்னு டாக்டர் சொன்னார்''
""நல்லாத் தெரியுதுங்களா?''
""பின்னாடி எங்க தெரியுது. இப்பவும் முன்னாடிதான் தெரியுது''
தேனி முருகேசன்.

""பயில்வானுக்கு இரண்டு குழந்தைகளா?''
""ஆமாம். ஆஸ்திக்கு ஒண்ணு, குஸ்திக்கு ஒண்ணு''

""நீயும் உன் தம்பியும் எப்பவும் ரொட்டி சாப்பிடுறீங்களே''
""நாங்க ரொட்டி சகோதரர்கள்''

பேங்க் மேனேஜர்: என்னை ஏன்யா கட்டிப் பிடிக்கிறாய்?
வந்தவர்: உங்களைப் பிடிச்சா லோன் கிடைக்கும்னு சொன்னாங்க

வேலைக்காரன்: சாவியை என்னிடம் பொறுப்பாக வைத்திருக்கச் சொல்லி குடுத்தீங்களே...
வீட்டுக்காரர்: அதுக்கென்ன?
வேலைக்காரன்: இந்த சாவி எந்த பூட்டுக்கும் சேரலையே...
எஸ்.மோகன், அருப்புக்கோட்டை

""பொங்கலுக்கும் இட்லிக்கும் என்ன வித்தியாசம்?''
""பொங்கலுக்கு லீவு விடுவாங்க; இட்லிக்கு லீவு விடமாட்டாங்க!''

""அவர் ஏன் ஒளிந்து ஒளிந்து மாவு அரைக்கிறார்?''
""நைஸா அரைச்சிட்டு வரச் சொன்னாங்களாம் அவரின் மனைவி''
எம்.அசோக்ராஜா,
அரவக்குறிச்சிப்பட்டி

""டாக்டர், நீங்க எழுதிக்கொடுத்த மருந்தில உடம்பு கொஞ்சங்கூட வத்தல. குண்டாவேதான் இருக்கு''
""அப்படியா? உங்களுக்கு எந்த ஊருன்னு சொன்னீங்க?''
""வத்தல குண்டு''
மு.பெ.எடிசன், விட்டுக்கட்டி

""தலைவருக்கு பொதுஅறிவு கம்மின்னு எப்படிச் சொல்ற?''
""ஃபேஸ்புக் எந்தக் கடையில கிடைக்குமுன்னு கேட்கிறாரு''
தாமரைநிலவன், திருத்துறைப்பூண்டி

""ராதாவுக்கு பத்து ரூபாய் கடன் கொடுத்தேன். அதில் ஒரு ரூபாய் திருப்பித் தந்துவிட்டாள்...ஒன்பது ரூபாய் தரவில்லை. அவளை என்ன சொல்லுவ''
""நயன்'தாரா''
ஜி.சாயி வினோத், கிருஷ்ணாபுரம்.

""இதுதான் சங்ககாலம்னு எப்படிச் சொல்றீங்க?''
""இந்தக் காலத்திலதான் எல்லாத்துக்கும் சங்கம் வச்சிருக்காங்களே, அதான்''
மு.பெரியசாமி,
விட்டுகட்டி

""ஏம்பா! சர்வர் சரக்கு மாஸ்டர் ஸ்பெஷலா என்னப் போட்டிருக்கார்?''
""லீவ் போட்டு இருக்கார் சார்!''
குலசை நஜூமுதீன்

நண்பன் பொன்மொழிகள்

1.எந்த ஒரு காயத்துக்கும் நண்பன் மருந்தாவான்.

2.உன் நண்பனுக்காக எதை வேண்டுமானாலும் விட்டுக் கொடு. ஆனால் ஒரு போதும் நண்பனை மட்டும் விட்டுக் கொடுத்து விடாதே!

3.வாழ வைப்பவன் இறைவன், வாழத் தெரிந்தவன் மனிதன், விழ வைப்பவன் துரோகி, தூக்கி விடுபவன் நண்பன்.

4.உரிமை கொண்டாடும் உறவை விட உறவைக் கொண்டாடும் நட்பே சிறந்தது.

5.ஒவ்வொரு நண்பர்களும் புதிய உலகத்தின் வாயிற்கதவுகள்.
6.உன்னைப் பற்றி முழுதாக அறிந்திருந்தும் உன்னை விரும்புபவனே உன் நண்பன்.

7.புதியவர்களை நண்பர்களாக்கிக் கொள்ளுங்கள்; பழைய நண்பர்களைத் தொடர்பில் வைத்துக் கொள்ளுங்கள். - புதியவர்கள் வெள்ளி என்றால் பழையவர்கள் தங்கம்.

8.நட்பு என்றும் தோல்வி அடைவதில்லை. தவறு
செய்வதும் இல்லை.

9.உங்களுக்கு நீங்களே கொடுத்துக் கொள்ளும் சிறந்த பரிசுதான் நட்பு.

10.பிரச்னைகளே இல்லாமல் கூட இருந்து விடலாம். ஆனால் உலகத்தில் நண்பர்கள் இல்லாமல் இருக்க முடியாது.
-சு.இலக்குமண சுவாமி, திரு

Thursday, November 29, 2012

விதவிதமான இயற்கை உணவுகள்

• அவலில் சிறிது தண்ணீர் தெளித்து நனைத்து அதில் சிறிளவு மினகுத்தூள் சேர்த்து, தேங்காய் துருவலையும் சேர்த்து வேக வைத்தால் கார உணவு தயார்.
• அவலை நனைத்து அதில் தேங்காய் பூ, சர்க்கரை, ஏலக்காய்த் தூள் ஆகியவற்றை சேர்த்து வேக வைத்தால் இனிப்பு உணவு தயார்.
• அவலை நொறுக்கி தண்ணீரில் கலந்து, சர்க்கரை, தேங்காய்ப்பால், முந்திரிப்பருப்பு, ஏலக்காய்த்தூள் ஆகியவற்றைச் சேர்த்து அவல் பாயசம் செய்யலாம்.
• அவலை நொறுக்கி, தயிர், வெங்காயம், மல்லி இலை, சிறிது இஞ்சி, கறிவேப்பிலை, பச்சை மிளகாய்ச் சேர்த்து வேக வைத்தால் தயிர்ச் சாதம் தயார்.
• கேரட்டைத் துருவி, அதில், மிளகாய், சீரகத்தூள், வெங்காயம், கறிவேப்பிலை, மல்லி இலை, தேங்காய்த் துருவல் ஆகியவற்றை சேர்த்தால் கேரட் பொரியல் ரெடி.
• பச்சைப்பூசணி (அ)கேரட்டை பொடிதாக்கி அதில் தயிர், சீரகத்தூள், வெங்காயம், மல்லி, கறிவேப்பிலை சேர்த்தால் பச்சாடி தயார் ஆகிவிடும்.
• கேரட், சௌசௌ, தடியங்காய், உருளைக்கிழங்கு ஆகியவற்றை அரிந்து சேர்த்து வைத்துக் கொண்டு பச்சை மிளகாய், தேங்காய், கறிவேப்பிலை, சீரகம் ஆகியவற்றை அரைத்து தயிரும் சேர்த்துக் கிளறினால் அவியல் ரெடி..

வரும் முன் காத்தால் இதயம் நன்றி சொல்லும்!

நெஞ்சு வலி என்பது ஒவ்வொருவருக்கும் மாறுபடும். சிலருக்கு அது மிக அதிகமாகவும், சிலருக்கு மிகக் குறைவாகவும் காணப்படும்.
நெஞ்சுவலியின் அளவைப் பொருத்து நோயின் தீவிரத்தை கணிக்க முடியாது. ஒரு சிலரோ ஒன்றுமே பிரச்னை இல்லாதபோதும் அதிகமான நெஞ்சுவலி உணருவார்கள். சிலருக்கு பிரச்னை பெரிதாகவும் அறிகுறிகள் மிகக் குறைவாகவும் இருக்கும். நீங்கள் கூறும் அறிகுறிகளைப் பொருத்துத்தான் மருத்துவர் அதற்கான பரிசோதனைகளை பரிந்துரைப்பார்.
உங்கள் மருத்துவர் நோய் குறித்து கேட்கும் கேள்விகளுக்கு சரியாக பதிலளிக்க வேண்டும். அவர் கேட்காத போதும் நீங்கள் உணரும் வலியினை துல்லியமாக கணித்து அவரிடம் விவரிக்க வேண்டும். அதாவது நெஞ்சு வலி ஒரே இடத்தில் மட்டும் உள்ளதா? ஓரிடத்திலிருந்து மற்றொரு இடத்திற்கு பரவுகின்றதா? எந்த நேரங்களில் இருக்கிறது? ஓய்வெடுத்தால் சரியாகிவிடுகிறதா (அ) மாறுபடுகிறதா? மிதமாக வலிக்கிறதா அல்லது தீவிரமாக தொடர்ந்து வலிக்கிறதா? என்ற கேள்விகளுக்கு சரியான பதில் அளிக்க வேண்டும்.

மார்பு வலி ஏற்படக் காரணம் என்ன? பொதுவாக ஒவ்வொரு இதய நோய்க்கும் ஒவ்வொரு விதமான மாறுபட்ட அறிகுறிகள் தோன்றும். சுத்தமான இரத்தம் இதயத்திற்கு வருவது தடைபடுவதால் இதயத்தசைகள் பகுதியாகவோ (அ) முழுவதுமாகவோ இயங்காததால் மாரடைப்பு ஏற்படுகிறது. தீவிரமான நெஞ்சு வலி, உயர் இரத்த அழுத்தம், மேலும் வலி இடது தோள் மற்றும் கை, தாடை, பற்கள் போன்றவற்றுக்கும் பரவுதல் ஆகியவை மாரடைப்பின் முக்கிய அறிகுறிகளாகும்.
÷ஆண்களுக்கு மார்புக்கு நடுவில் பாரம் மற்றும் அழுத்தத்தை உணர முடியும். அதேபோல் பெண்களுக்கு நெஞ்சு எரிச்சல் மற்றும் மூச்சு விட முடியாமல் திணறுதல், அதிக வியர்வை, வாந்தி, மயக்கம், தலைவலி ஆகியவை அனைத்தும் ஏற்பட்டு அசெüகரியத்தை உணருவார்கள்.

இதய நோயின் வகைகள்: "ஆஞ்சைனா பெக்டோரிஸ்' என்ற இதய நோய், இதயத்துக்கு வரும் ஆக்ஸிஜன் தற்காலிகமாக தடைபட்டு தேவையான ஆக்ஸிஜன் கிடைக்காமல் போவதால் ஏற்படுகிறது. உடற்பயிற்சிக்குப் பின் நெஞ்சு வலி ஏற்படுவது,
மேலும் மன அழுத்தத்தின் போது மூச்சுத் திணறல், இதய அழுத்தம், மற்றும் பாரமாக இருப்பது, தலைவலி, நெஞ்செரிச்சல், அதிகம் வியர்த்து கொட்டுவது போன்றவை இதன் அறிகுறிகளாகும். இதயத்தின் இரத்த ஓட்டம் தடைபடுவதால் உருவாகும் தொடர் நெஞ்சு வலி காரணமாக "வேசோஸ்பாஸ்டிக் ஆஞ்சைனா' எனும் இதய நோய் ஏற்படுகிறது. இது முக்கியமாக இரவில் ஏற்பட்டு தூங்க முடியாமல் செய்துவிடும்.
÷மேல்கூறிய அறிகுறிகளை கேட்டறிந்த மருத்துவர் மேலும் சில உடல் பரிசோதனைகள் செய்த பிறகு இதய நோயை உறுதிப்படுத்துவார்.
÷அதாவது முதலில் நோயாளியின் உதடு மற்றும் நகங்களில் நீல நிற மாற்றம் தோன்றினால் இரத்தத்தில் ஆக்ஸிஜன் குறைவாகியிருக்கும். மேலும் தொடும்போது உடல் குளிர்ந்தோ, சூடாகவோ இருக்கிறதா என்று பார்ப்பார். மேலும் கால்மூட்டுகளில் வீக்கம் இருந்தால் அந்த இடங்களில் சரியான இரத்த ஓட்டம் இல்லாமல் இருக்கலாம். நாடித்துடிப்பில் மாற்றம் உள்ளதா என்றெல்லாம் பரிசோதிப்பார்.
÷மேலும் மருத்துவரால் தனது ஸ்டெதஸ்கோப்பின் மூலம் இதயத்தின் துடிப்பு மற்றும் ரிதம் வைத்து எந்த வகையான இதய நோய் என்பதைக் கண்டறிய முடியும். இதயத்துடிப்பு வேகமாக உள்ளதா அல்லது மெதுவாக தடைபட்டுக் கேட்கிறதா, இடைவெளி சரியாக இருக்கிறதா என்பதை வைத்து நோய் இதயத்தின் எந்தப் பகுதியில் உள்ளது என்பதைக் கண்டுபிடிக்க முடியும். அதாவது இதயத் தசைகளிலா அல்லது இரத்தக் குழாய்களிலா என்பதைக் கூற முடியும்.

இதய இரத்த ஓட்டம் மூலம்...பொதுவாக இதயத்தில் இரத்த ஓட்டம் சத்தமில்லாமல் இருக்கும். ஆனால் அது ஷ் ஷ்........ என்ற சத்தத்துடன் அடங்காமல் இரைச்சல் அதிகமாக இருந்தால் இரத்தக் குழாயில் கசிவு ஏற்பட்டு இரத்தம் இதயத்துக்கு வராமல் பின்னோக்கிப் போகிறது என்று கணிக்கலாம். காரணம் இதயம் சுருங்கும்போது இரத்த பரிமாற்றம் இடது ஏட்ரியம் மற்றும் கீழறைக்குமிடையே சரிவர நடைபெறவில்லை எனக் கொள்ளலாம். இதய ஓலி முறையற்றும், வலியுடனும் இருந்தால் தமனிகளில் கடினமான பிளேக் எனும் கொழுப்பு அடைபட்டிருப்பதாகக் கொள்ள வேண்டும்.
மேலே கூறிய சோதனைகளைப் பொருத்து மருத்துவர் அதற்கேற்ற பரிசோதனைகளை பரிந்துரைப்பார். பெரும்பாலானவை ஊசி துளைக்காதவை. அதாவது ஊசி துளைக்காத பரிசோதனைகள் } வலி மற்றும் அபாயமற்றது. உஇஏஞ, 3ஈஇஇஎ (ஆஞ்சியோ கார்ட்டோகிராம்) போன்ற சோதனைகளுக்கு ஆக்ஸிமெட் மருத்துவமனையில் தங்கும் அவசியமில்லை. தற்காப்பு காரணமாக இதுபோல் சோதனைகளை நோய்வருமுன் செய்து நாம் நன்றாக இருக்கிறோமா என்று தெரிந்து கொள்வது நல்லது.
÷உலக இதய தினத்தை (செப்.29) முன்னிட்டு ஆக்ஸிமெட் மருத்துவமனையில் இதய மருத்துவப் பரிசோதனைகளை முன்பதிவு செய்யும் முதல் 500 நோயாளிகளுக்கு 50 சதவீத கட்டணச் சலுகை அளிக்கப்படும்.
இந்த சலுகை குறுகிய காலம் மட்டுமே. முன்பதிவு செய்யவும், மேலும் விவரங்கள் அறியவும் தொடர்பு கொள்ள வேண்டிய முகவரி:-

ஆக்ஸிமெட் மருத்துவமனை,

Saturday, November 10, 2012

உணவு நஞ்சாவதை ச் சரி செய்ய எளிய வழிகள்

தீபாவளிப் பண்டிகை நெருங்கிவிட்டது. ஏராளமான இனிப்புகளும், உணவுகளும் செய்யப்படும் காலம் இது. இந்த சமயத்தில் பலருக்கும் ஏற்படும் ஒரு பிரச்னை உணவு விஷமாதல்தான்!
பொதுவாகவே புட் பாய்சன் ஏற்பட்டால், அதனால் வாந்தி, பேதி, வயிற்று வலி, வயிறு எரிச்சல், லேசான காய்ச்சல், தலைவலி, தசைவலி போன்றவற்றில் ஏதேனும் ஒன்று ஏற்படும்.
இதுபோன்ற புட்பாய்சன் பிரச்னைகளை தீர்க்க எளிய வழிகள் உள்ளன.
இஞ்சி சாறு
இஞ்சி சாறினை தேனில் கலந்து உட்கொள்ளலாம். அல்லது இஞ்சியை தேனில் தொட்டு மென்று சாப்பிடலாம். அது முடியாதவர்கள் இஞ்சி கலந்த தேனீரை அருந்தலாம். இவ்வாறு செய்வதால், அஜீரணக் கோளாறுகள் நீங்கும்.
சீரகச் சாறு
சீரகப் பொடி சேர்த்து சூப் குடிப்பது அல்லது சீரகத்தை நன்கு வறுத்து அதில் ஒரு டம்ளர் தண்ணீரை கொதிக்க வைத்து அதனை அருந்துவதால் வாந்தி நிற்கும்.
துளசிச் சாறு
துளசியை வெறுமனே எடுத்து வாயில் போட்டு மென்றால் கூட உடனடியாக அஜீரணக் கோளாறுகள் சரியாகும். புட் பாய்சன் அதிகமாக இருந்தால், துளசிச் சாறினை வெறும் வயிற்றில் குடிக்கலாம். அல்லது, உணவு உண்ட பிறகு ஏற்படும் பிரச்சினையாக இருப்பின், துளிச் சாறு எடுத்து அதனை தேனுடச் சேர்த்து சாப்பிடலாம்.
எலுமிச்சை சாறு
புட் பாய்சனால் வயிற்றில் ஏற்பட்ட கிருமிகளை அழிக்கும் ஆற்றல் எலுமிச்சை சாறுக்கு உள்ளது. எனவே, எலுமிச்சை சாற்றை உப்பு கலந்து குடித்தால் வயிற்று உபாதைகள் குறையும். முடிந்தால் எலுமிச்சை கலந்து தேனீர் அருந்தலாம். மேலும், வயிற்று உபாதையால் அவதிப்படுவோர் எலுமிச்சை சாறு குடிப்பதால் உடனடியாக புத்துணர்ச்சி அடைய முடியும்.
புதினாச் சாறு
புதினாச் சாறு வயிற்று உபாதைகளுக்கு நல்ல மருந்தாகும். அஜீரணக் கோளாறுகளை சரி செய்யும் ஆற்றல் புதினாவுக்கு உண்டு. புதினாச் சாறை டீயுடன் சேர்த்து குடித்தால் நல்ல பலன் கிடைக்கும். அஜீரணக் கோளாறு அதிகமாக இருப்பவர்கள் புதினாச் சாறு எடுத்தும் குடிக்கலாம்.

Saturday, October 6, 2012

தலைவர்கள் நடத்திய இதழ்கள்

லெனின்
புராலிடேரியட், ஸ்பார்க்

---------------------------

கார்ல் மார்க்ஸ்
நைன்லாந்து கெசட்

---------------------------

மாஜினி
யங் இத்தாலி

---------------------------

ஹிட்லர்
வால்கிஷர்

---------------------------

முசோலினி
இல்-பாப்லோ டீ, இடாலியோ

---------------------------

காந்தியடிகள்
யங் இந்தியா, ஹரிஜன்

---------------------------

அன்னிபெசன்ட்
லிங்க், நியூ இந்தியா

---------------------------

பெரியார்
குடியரசு, விடுதலை

---------------------------

அண்ணா
திராவிட நாடு, காஞ்சி
---------------------------

Wednesday, August 15, 2012

சிறந்த அறிவுரைகள்

First Published : 12 Aug 2012 04:39:00 PM IST

தினமணி ஞாயிறு கொண்டாட்டம்

வில்லியம் ட்யூரண்ட் ஒரு சிறந்த அமெரிக்க சிந்தனையாளர். அவர்தம் பேரப் பிள்ளைகளுக்கு எழுதிய பத்து அறிவுரைகள் இவை. எல்லாக் குழந்தைகளுக்கும்ஏற்ற அறிவுரைகளாக இவை இருப்பதுதான் சிறப்பு. •உடலையும் உள்ளத்தையும் துப்புரவாக்கிக் கொண்டபின் உன் யோசனையைத் தொடங்கு. உன் குளியலறையை நீயே சுத்தம் செய்து நன்றாக வைத்துக் கொள். •காலையில் எழுந்ததும் உன் அறையைவிட்டு வெளியே வரும்போது உன்னுடைய அழுக்கு உடைகளைத் துவைப்பதற்காகத் தனிக் கூடையில் போட மறக்காதே. •நன்றாக ஆடை உடுத்திக் கொள். புது நபர்கள் நம்மை நெருங்கிப் பழகி அறிந்து கொள்வதற்கு முன்பு நம் உடையைப் பார்த்துத்தான் நம் தரத்தை எடை போடுகிறார்கள். மதிப்புள்ள பிரமுகர்களின் கருத்து நம் உயர்வுக்கும் நல்வாழ்வுக்கும் வகை செய்கிறது. •தினமும் குடும்பத்திலோ வெளியிலோ மற்றவர்களுடன் பழகத் தொடங்கும்போது புன்சிரிப்போடு இரு; அப்படியே பழகு. உன் குறைகளைக் குறைவாகவும் உன் நிறைகளை அதிகமாகவும் எண்ணி மகிழ்ச்சி கொள். •மற்றவர் பேசும்போது நீ குறுக்கே பேசாதே; உனக்குப் பேச வாய்ப்புக் கிடைக்கும்போது பேசு; பணிவாகவே பேசு. வம்பு வளர்க்கும் வாக்குவாதத்தில் இறங்காதே. உண்மையை ஏற்றுக் கொள், •எல்லோரிடமும் பண்போடு கண்ணியமாகப் பழகு. விட்டுக் கொடுக்கவும் உதவவும் தயாராக இரு. முக்கியமாக உன் விரோதிகளிடத்தில் இவற்றைத் தவறாது மேற்கொள். •பண்படாத பயனில்லாத தீங்கு தரும் சொல், செயல், காட்சிகளை மிக மிகக் குறைவாகவே அணுகு. உன் மூளைக்கு ஏற்றபடிதான் உன் புத்தி அமையும். உன் மூளையைக் குப்பைத்தொட்டியாக்கிக் கொள்ளாதே. •தினமும் ஏதாவது நல்ல விஷயத்தைப் படித்துக் கொண்டு வா. இப்படியே படித்துப் படித்து முடிந்தவரையில் கல்வியறிவை வளர்த்துக் கொண்டே இரு. •வெளிக்குப் பணிவுள்ளவனாகவும் உள்ளுக்குள் தன்மானம் நிரம்பியவனாகவும் இரு. பணிவினால் அக்கம்பக்கத்தாரிடமும் புதியவர்களிடமும் நல்ல பெயர் எடுப்பது எளிது. •கடுமையான வழியும் வேண்டாம். எளிமையான வழியும் வேண்டாம். நடுத்தர வழியில் முன்னேறு. வெற்றிக்கு எளிய வழி இதுதான்.

Wednesday, October 9, 2013

சிரி... சிரி...

Thursday, October 3, 2013

பயனுள்ள மருத்துவக் குறிப்புகள்

Monday, September 30, 2013

பழங்களின் அரசி

என்றழைக்கப்படும்

திராட்சை

Monday, August 26, 2013

உடல் மற்றும் மன நிலையை எடுத்துக் காட்டும் கருவளையம்

Thursday, June 27, 2013

மனித ச் சங்கிலி முறையில் 10 பேருக்கு ச் சிறுநீரக அறுவை

இரு நாடுகளுக்கு இடையே அமைந்துள்ள

விக்டோரியா நீர்வீழ்ச்சி

Saturday, May 18, 2013

சிரிப்பதற்காக சில நகைச்சுவைகள்

Monday, March 18, 2013

நிறை நிலா (வெள்ளுவா) வராத மாதமும் உண்டு

கருத்துகள்(2)

Friday, January 18, 2013

இன்றைய மருத்துவக் குறிப்புகள்

பயன் தரும் மருத்துவக் குறிப்புகள்

Saturday, December 8, 2012

கடி

Saturday, December 1, 2012

சிரி...சிரி... சிரி...சிரி

நண்பன் பொன்மொழிகள்

Thursday, November 29, 2012

விதவிதமான இயற்கை உணவுகள்

வரும் முன் காத்தால் இதயம் நன்றி சொல்லும்!

இந்த பகுதியில் மேலும்

Saturday, November 10, 2012

உணவு நஞ்சாவதை ச் சரி செய்ய எளிய வழிகள்

Saturday, October 6, 2012

தலைவர்கள் நடத்திய பத்திரிகைகள்

Wednesday, August 15, 2012

திருக்குறள்

Blog Archive

About Me